පොත් අඩුවේ ගුල්ලන් වැඩිවේ.

නූතන අධ්‍යාපන රටාව සියයට සීයක්ම තරගකාරීය. එය අවිවාදයෙන් පිලිගත යුත්තකි. මේ හේතුව නිසාවෙන්ම බාලාංශයේ සිට දරුවන් හට අධ්‍යාපනය වෙනුවෙන් මහා වෙහෙසක් දැරීමට සිදු වී තිබේ. රටක තරගකාරී අධ්‍යාපනයක් පැවතීම යහපත්ය. නමුත් තරගකාරී අද්‍යාපනය නිසාවෙන් සිදු වූ මහා විනාෂයක්ද නිරතුරුව ශිෂ්‍ය ප්‍රජාව කෙරෙන් දැක ගත හැක.

දෙමාපියන් සිතන්නේ තරගකාරී අධ්‍යාපනය තුලදී දරුවන් පොත පතේ දැනුමට සීමා විය යුතුයැයි යන පටු හැගීමෙනි. එනිසාවෙන්ම කොතරම් කැමැත්තෙන් පාසලේ බාහිර ක්‍රියා කාරකම් සදහා පිවිසෙන්නට දරුවන් උත්සාහ කලද දෙමාපියන්ගෙන් ඒ සදහා ඉඩ ප්‍රස්තාව අහිමි වී යයි.

මේ හේතුව මත දැන හෝ නොදැන දරුවන් පොත පතට පමණක් සීමා වේ. ඉන් ඔබ්බට ගියා වූ ලොවක් ඔවුන්ට නොමැත. ඔවුන්ගේ ලෝකය ගොඩ නැගෙන්නේ පොත පතින් මිස අන් කිසිවකින් නොවේ .මෙලෙසින් දිගින් දිගටම දරුවන් පොතේ දැනුමට පමණක් සීමා වූ විට බිහිවන්නේ " පොතේ ගුරෙකි. " පොතේ ගුරු වූ කලී පොතක් දෙස බලා ගෙන එහි ඇති දෑ කියවාගෙන යන්නෙකි . පොත පතට හිර වූ දරුවන්ද එසේමය. පොතෙන් පිට සමාජීය දැනුමක් ඔවුන්ට නැත.

එනිසාවෙන්ම ඔවුන් ලෝකය දකින්නේ පටු ඇසකිනි . එවැන්නන් හට නූතන සමාජයට අනුගත වීම අපහසුය. මන්ද නූතන සමාජය වූ කලී පොතේ දැනුම නොව ඉන් ඔබ්බට ගියා වූ දෛනික ජීවිතයේ ප්‍රායෝගික දැනුමද සම්මිශ්‍රනය වුනා වූ ඒකකයකි . ඉදින් පොතට පතට පමණක් සීමා වූ ඔවුන් සමාජය තුලදී පසෙකට තල්ලු වී යන්නේ බොහෝ විට ඔවුන් කිසිදු දෙයක ප්‍රායෝගිකත්වයක් සජීවී බවක් අත්නොවිදින නිසාවෙනි.

වර්ථමානය වන විට බහුතරයක් වූ අපේ ශිෂ්‍ය ප්‍රජාවට සිදු වී ඇත්තේද මෙයමය. මෙය රටේ හෙට දවසට හොද ලකුණක් නම් නොවේ . රටක සංවර්ධනයට පොත පතේ දැනුමපමණක් නොව සාමාජීය මෙන්ම, ඕනෑම කරුණක් පිලිබදව ප්‍රායෝගික දැනුමකුත් අවශ්‍යය. නැතිනම් සිදු වන්නේ අසීමාන්තිකව වනපොත් කරනා ශිෂ්‍ය ප්‍රජාවක් හමුවේ රටේ සංවර්ධනය අඩාල වීම පමණකි . එසේ වුවහොත් අපේ රටේ අනාගතයට හොද පොතක් පෙරලෙනු ඇත.

රසාරා නිර්මාණි ජයකොඩි.
13-A
කලා.